Məmməd Araz - Ayağa dur Azərbaycan 

Nə yatmısan qoca volkan səninləyəm !

Ayağa dur Azərbaycan səninləyəm !

Səndən qeyri,

Biz hər şeyi bölə bilərik.

Səndən qeyri,

Biz hamımız ölə bilərik.

Bu Şəhriyar harayıdır,

Bu Bəxtiyar harayıdır.                                                

                                                             

                                                              Ayağa dur Azərbaycan!

 

                                                            Bunu bizə zaman deyir.

                                                                                 Məzarından baş qaldıran baban deyir:

                                                                Nər oğlu nər səninləyəm!

                                                                                               Səninləyəm, silah tutan, külüng tutan, yaba tutan,

                                                                       Kosöy tutan nişanlı ər səninləyəm.

                                                      Səninləyəm qız atası,

                                                         hanı nərən, hanı səsin?

                                                   Hanı andın?

 

                                                                  Yoxsa səndə yatmışlara, batmışlara, 

                                                            Qeyrətini satmışlara xırdalandın?

                                     Ayağa qalx!

                                    Üfüqünə bir yaxsı bax.

                                      Sərhədinə bir yaxsı bax,

                                                     Sərhədinin kəməndinə bir yaxsı bax!

                                               Dur içindən qorxunu boğ,

                                              Ölümünlə  qalımını ayırd elə.

                                             Dur içindən dovşanı qov,

                                          Dur özünü bozqurd elə!

 

                                            Varım - yoxum səninləyəm!

                                          Azım - çoxum səninləyəm!

                                        Şirin yuxum səninləyəm!

                                     Yıxın məni söz atından

                                      Atın məni tank altına!

                                          Əzin məni xıncım - xıncım,

Kəsmir əyər söz qılıncım.                                                

Didin məni didim - didim,                                                

Atın məni tank altına!                                                     

Qundaqdakı bir körpəni xilas edim.                                          

 

Səninləyəm,                                                         

Sözü qəmli, özu dəmli                                                   

Rəhbər adam!                                                         

1918-də vuruşurdu,                                                     

Danışmırdı rəncbər atan                                                  

Rəncbər atam!                                                         

 

Oyat bizi ey yaradan səninləyəm!                                           

Ya birmərrə yatırt bizi,                                                 

Ya birmərrə oyat bizi                                                   

 Ya yenidən yarat bizi                                                    

 Ey Yaradan, səninləyəm!                                              

Səninləyəm yatmış vulkan, səninləyəm                              

Ayağa dur Azərbaycan səninləyəm!!!