Mayın 3-də Naxçıvan şəhərindəki Heydər Əliyev Sarayında Türkiyə Respublikasının Bursa Dövlət Simfonik Orkestri ümummilli lider Heydər Əliyevin anadan olmasının 95-ci ildönümünə həsr olunmuş konsert proqramı ilə çıxış edib.

Naxcivantv.az xəbər verir ki, Naxçıvan Muxtar Respublikası Ali Məclisinin Sədri Vasif Talıbov Bursa Dövlət Simfonik Orkestrinin konsertində olub.

Naxçıvan Muxtar Respublikasının mədəniyyət naziri Nətavan Qədimova çıxış edərək deyib ki, Naxçıvan Muxtar Respublikası Ali Məclisi Sədrinin “Ümummilli lider Heydər Əliyevin anadan olmasının 95 illiyinin Naxçıvan Muxtar Respublikasında keçirilməsinə dair Tədbirlər Planı”nın təsdiq edilməsi haqqında” 2018-ci il 16 aprel tarixli Sərəncamına əsasən Ümummilli Liderimizin anadan olmasının 95-ci ildönümü muxtar respublikamızda geniş qeyd olunur, silsilə tədbirlər, idman yarışları və konsert proqramları keçirilir. Tədbirlər Planına uyğun olaraq bu gün Türkiyə Respublikasının Bursa Dövlət Simfonik Orkestrinin ümummilli lider Heydər Əliyevin anadan olmasının 95-ci ildönümünə həsr olunmuş konserti keçirilir.

Qeyd olunub ki, ümummilli liderimiz Heydər Əliyev Naxçıvan Muxtar Respublikasında yaşayıb fəaliyyət göstərərkən əsasını qoyduğu Azərbaycan-Türkiyə əlaqələrini ikinci dəfə ali hakimiyyətə qayıtdıqdan sonra “Bir millətin, iki dövləti” səviyyəsinə yüksəldib. Dahi şəxsiyyətin yolunu uğurla davam etdirən ölkə Prezidenti cənab İlham Əliyev də Azərbaycan-Türkiyə əlaqələrinə mühüm əhəmiyyət verir, ikitərəfli münasibətlərimiz müxtəlif sahələr üzrə uğurla inkişaf edir. Bu gün Azərbaycanın Naxçıvan Muxtar Respublikası ilə Türkiyə arasında iqtisadi-ticarət, elm, təhsil, nəqliyyat, turizm, ordu quruculuğu və mədəniyyət sahələrində səmərəli əməkdaşlıq vardır. Mədəniyyət kollektivlərinin və incəsənət xadimlərinin qarşılıqlı səfərləri, birgə mədəni-kütləvi tədbirlərin və konsertlərin təşkili də bu baxımdan mühüm əhəmiyyətə malikdir. Qardaş Türkiyənin Bursa Dövlət Simfonik Orkestri ilk dəfədir Naxçıvanda konsert proqramı ilə çıxış edir. Orkestr 1999-cu ildə Bursa şəhərində yaradılıb, 2012-ci ildə Türkiyədə keçirilən müsabiqədə “İlin orkestri” adına layiq görülüb.

Bakı Musiqi Akademiyasının dirijorluq kafedrasının professoru, Xalq Artisti Yalçın Adıgözəlovun və orkestrin rəhbəri Sedat Dağhan Doğunun dirijorluğu ilə keçirilən konsertdə Üzeyir Hacıbəyovun, Qara Qarayevin, Fikrət Əmirovun, Tofiq Quliyevin, Niyazinin, Vasif Adıgözəlovun, türkiyəli bəstəkar Ülvi Camal Erkinin, dünya bəstəkarlarından Jorj Bizenin, Rudcero Leonkavallonun, Antonio Vivaldinin, Cakomo Puççininin əsərləri, eləcə də Sevil Əliyevanın “Ana” mahnısı məharətlə ifa olunub. Azərbaycan Respublikasının Xalq Artisti Samir Cəfərovun, Azərbaycan Respublikasının və Naxçıvan Muxtar Respublikasının Əməkdar Artisti Eytiram Hüseynovun, İzmir Opera Teatrının solisti Levent Gündüzün, müğənnilərdən Elton Hüseynəliyevin və Gülay Zeynallının çıxışları alqışlarla qarşılanıb.      

Bursa Dövlət Simfonik Orkestrinin konserti “Xalq Heydər söyləyəcək” və “Qarabağ şikəstəsi”nin ifası ilə sona çatıb.

Naxçıvan Muxtar Respublikası Ali Məclisinin Sədri Vasif Talıbov səhnə arxasına keçərək Bursa Dövlət Simfonik Orkestrinin üzvləri ilə görüşüb, onları uğurlu konsert proqramına görə təbrik edərək deyib: Azərbaycanın ayrılmaz hissəsi olan Naxçıvan sizin ikinci vətəninizdir. Böyük Atatürk deyirdi ki, “Azərbaycanın sevinci bizim sevincimiz, kədəri bizim kədərimizdir”. Ümummilli liderimiz Heydər Əliyev isə deyirdi ki, “Azərbaycan və Türkiyə bir millət, iki dövlətdir”. Bugünkü konsert dahi rəhbərlərimizin fikirlərinin nümayişinə çevrildi. Sevincli gündə bir yerdə olduq, bir millətin, iki dövlətin orkestri gözəl konsert proqramı ilə çıxış etdi.

Ali Məclisin Sədri deyib: Qısa müddətdir yaranmasına baxmayaraq Bursa Dövlət Simfonik Orkestri təqdim etdiyi konsert proqramı ilə dünya səviyyəli orkestr olduğunu göstərdi. Orkestrin bugünkü çıxışı sadəcə bir konsert proqramı deyil. Bu, xalqın mədəniyyətinin göstəricisidir. Bütün bunlar ölkələrimizin inkişafının nəticəsində mümkün olmuşdur. Bu gün Azərbaycanda və Türkiyədə sənaye və kənd təsərrüfatı ilə yanaşı, mədəniyyət də inkişaf edir. Çünki mədəniyyətin inkişafı olmadan ölkənin ümumi inkişafını təmin etmək mümkün deyil.

Ali Məclisin Sədri konsertin təşkilatçılarına təşəkkürünü bildirib, Bursa Dövlət Simfonik Orkestrini yenidən Naxçıvana konsertə dəvət edib.

Bursa Dövlət Simfonik Orkestrinin üzvü Gökçə Özlər və Bakı Musiqi Akademiyasının dirijorluq kafedrasının professoru, Xalq Artisti Yalçın Adıgözəlov Naxçıvanda olmaqdan və Ulu Öndərin anadan olmasının 95-ci ildönümünə həsr olunmuş konsertin təşkilindən məmnunluqlarını, bundan sonra da muxtar respublikada konsert proqramları ilə çıxış edəcəklərini bildirib, fəaliyyətlərinə verilən yüksək qiymətə görə orkestrin heyəti adından minnətdarlıq ediblər.

Digər rəsmi xəbərlər

İnkişaf, tərəqqi və sabitliyin bəhrəsi – müasir Azərbaycan kəndləri
Naxçıvan şəhərində Dünya Azərbaycanlılarının Həmrəylik Günü və Yeni İl bayramı qeyd olunub
Buzqov kəndində yerləşən hərbi hissənin əsgəri-məişət yaşayış kompleksi istifadəyə verilib
Beşinci çağırış Naxçıvan Muxtar Respublikası Ali Məclisinin doqquzuncu sessiyası keçirilib
Şərur Rayon Tarix-Diyarşünaslıq Muzeyinin yeni binası istifadəyə verilib
 Naxçıvan Muxtar Respublikası Ali Məclisində görüş
Naxçıvan Muxtar Respublikası Ali Məclisinin Sədri İSESKO-nun Baş direktorunun və TÜRKSOY-un Baş katibinin müavinləri ilə görüşüb
Naxçıvanda ümummilli liderimiz Heydər Əliyevin xatirəsi yad edilib
 Naxçıvan Muxtar Respublikası Ali Məclisində müşavirə keçirilib
Ali Məclisin Sədri Fərman imzaladı
Ağbulaq Xizək Mərkəzinin tikintisi davam edir
Ağbulaq Kənd Turizm-İstirahət Bölgəsinin təqdimatı olub
Culfa rayonunun Qazançı kəndi abadlaşan kəndlərimiz sırasına daxil oldu
Naxçıvan Muxtar Respublikası Ali Məclisində görüş
Heydər Əliyev siyasi xətti Azərbaycanın dünəni, bu günü və gələcəyidir
Prezident Naxçıvanın ədliyyə işçilərini təltif etdi - SƏRƏNCAM
Kəngərli rayonunda qapalı suvarma şəbəkəsi istifadəyə verilib
Naxçıvan Muxtar Respublikası Ali Məclisində görüş - VİDEO
Naxçıvan Muxtar Respublikası Ali Məclisində görüş
Naxçıvanda “Ailə təsərrüfatı məhsulları” festivalı keçirilib
Naxçıvan Muxtar Respublikası Ali Məclisinin Sədri Rusiyanın Azərbaycandakı səfiri ilə görüşüb
Yeni inzibati bina istifadəyə verilib
Prezident Naxçıvanın kənd təsərrüfatı işçilərini təltif etdi - SƏRƏNCAM
Naxçıvan Qarnizonu qoşunlarının birgə təlimi keçirilib
Ali Məclisin Sədri Sərəncam imzaladı
Geriyə
İrəli